ဒီစီသွား တောလား - ၄

၂၄ မတ် ၂၀၂၄ တနင်္ဂနွေနေ့ မနေ့က မိုးတနေကုန်ရွာထားတော့ ကောင်းကင်က တိမ်ကင်းစင်ကာ ကြည်လင်ပြာလဲ့နေတယ်။ နေရောင်ခြည်လင်းလက်ပြီး သြကာသတခုလုံး သာယာလှပနေတယ်။ အိမ်ဖြူတော်နဲ့ တလမ်းပဲခြားတော့ ဒီနေ့နေသာလှတယ်ဆိုပြီး ဓာတ်ပုံသွားရိုက်တယ်။ ဆယ်ကျော်သက်အရွယ် သမီးနှစ်ယောက်နဲ့အမေက ကိုယ်တို့ကို ဓာတ်ပုံရိုက်ပေးရမလား မေးလာပြီးရိုက်ပေးတယ်။ ချယ်ရီပန်းနားမှာ ဓာတ်ပုံရိုက်နေတော့လည်း သူတို့ဖြတ်သွားတာနဲ့ကြုံလို့ ဓာတ်ပုံရိုက်ပေးသွားတယ်။ ပြီးတော့ ကားပေါ်ကနေ လက်ပြသွားသေးတယ်။ အမေရိကန်တွေက အဲ့ဒီလိုဖော်ရွေတယ်။ ဘိလပ်သွားတုန်းက ဘိလပ်သားတွေက စကားလာမပြောကြဘူး။ ဥရောပသားတွေက အဲ့လိုပဲတဲ့။ မနက် ၉ နာရီလောက် မြေအောက်ရထားစီးပြီး ၁၀ မိနစ်အကြာ Capitol South ဘူတာမှာဆင်းတယ်။ ဒီစီရထားတွေက သန့်ရှင်းနေတာပဲ နယူးယောက်က ရထားတွေနဲ့ တခြားစီ။ အဖေတို့က ဒီစီရထား ပထမဆုံးစီးဖူးတာဆိုတော့ အမှတ်တရဓာတ်ပုံရိုက်ပေးတယ်။ Library of Congress ကပိတ်တယ် Capitol tour ကဖွင့်ပေမဲ့ ၂၀၁၇ က ရောက်ဖူးတယ်။ အဖေတို့ကို မေးကြည့်တော့ မှတ်မိကြတယ်။ နေပူနေပေမဲ့ အေးလိုက်တာ ဆောင်းတွင်းကျနေတာပဲ။ ကယ်ပီတယ်နားမှာ ချယ်ရီပန်းတွေ ပွင့်နေတာ သိပ်လှတာပဲ။ ဒီနေရာက သမ္မတတွေ ကျမ်းသစ္စာကြိမ်ဆိုတဲ့နေရာ၊ ကျောက်တိုင်၊ ပြတိုက်တွေနဲ့ National Mall ကိုတမျှော်တခေါ်ကြီး မြင်ရတယ်။ ကိုယ်အရင်ရုံးက ကယ်ပီတယ်နားမှာ သောကြာနေ့ညနေဆိုရင် ကယ်ပီမောလ်တလျှောက် လမ်းလျှောက်ပြီးမှ အိမ်ပြန်တယ်။ ပိတ်ရက်ဆို ဒီစီကိုလာ ပြတိုက်မှာ တနေကုန်လည်။ တကိုယ်ရေ လွှင့်မျောခြင်းနေ့ရက်များ။ နေ့လည် ၁၂ နာရီလောက် ရထားစီးပြီး ဟိုတယ်ပြန် နေ့လည်စား။ ညနေစောင်း Tidal Basin ဖက်မှာ ချယ်ရီပန်းသွားကြည့်တဲ့ အကြောင်းကတော့ နောက်ပို့စ်မှပဲ တင်ပါတော့မယ်။

Happy Traveling!

စန်းထွန်း

ဧပြီ ၂၀၊ ၂၀၂၄။

ဒီစီသွား တောလား - ၃

၂၀၂၄ မတ် ၂၃ စနေနေ့ National Gallery of Art ပြတိုက်က ပန်းချီကားလေးတွေပါ။

စန်းထွန်း

ဧပြီ ၁၇၊ ၂၀၂၄။

ဒီစီသွား တောလား - ၂

၂၀၂၄ မတ် ၂၃ စနေနေ့ မိုးက တော်တော့ကို ရွာနေတာ။ အိမ်ဖြူတော်ဆီ လမ်းလျှောက်ပြီး white house tour ဆီ ဝင်တန်းစီတာ booking confirmation မပါလို့ မဝင်ရဘူး။ white house tour က ကိုယ့်ပြည်နယ်ရဲ့ လွှတ်တော်အမတ်ဆီကနေ တင်ရတယ်။ နိုင်ငံခြားသားဆိုရင်တော့ သံရုံးကနေ တင်ပေးရတာ။ မြန်မာသံရုံးက ဘယ်လိုလုပ်ပြီး တင်ပေးမှာလဲ။ မိုးနည်းနည်းစဲတော့ ၄၅ မိနစ်လမ်းလျှောက်ပြီး National Gallery of Art ဆီသွားတယ်။ National History Museum ရှေ့မှာ တန်းစီနေကြတာ လူတန်းကြီးက အရှည်ကြီး။ National Gallery of Art ကိုယ်တန်းစီပြီး မကြာခင်ဘဲ လူတန်းကြီးက အရှည်ကြီးဖြစ်သွားတယ်။ ပန်းချီပန်းပုလက်ရာတွေကတော့ အံ့မခန်း ကြည့်လို့ကိုမဝဘူး။ ၂ နာရီကြည့်တာ ၂၀ ရာခိုင်နှုန်းလောက်ပဲ ကြည့်ပြီးသေးတယ်။ ဘယ်လောက်ကြီးသလဲ စဥ်းစားကြည့်တော့။ အပြန်ကျတော့ ပိုဝေးပေမဲ့ National Mall ကနေ ပတ်ခေါ်လာတော့ Capital ၊ Washington Monument ၊ White House ဘယ်မှာဆိုတာ သေသေချာချာ သိသွားတော့တယ်။ တခုချင်းစီ ရောက်ဖူးပြီး ခုမှချိတ်ဆက်သွားတော့တယ်တဲ့။ ၂၀၁၃ ဒီစီမှာ အလုပ်လုပ်တုန်းကဆိုရင် သောကြာနေ့ညနေဆို ကယ်ပီတယ်ကနေ National Mall အထိလမ်းလျှောက်။ အနီးအနားဘူတာကနေ ရထားစီးပြီးအိမ်ပြန်။ ပိတ်ရက်ဆို ဒီစီလာ ပြတိုက်တွေ တနေကုန်ပတ်။ ရာသီဥတုက တော်တော်ဆိုးတယ် မှောင်မည်းလေတိုက်။ တိုးကားတွေ ချပေးတဲ့ ကျောက်တိုင်ဖက် အိမ်ဖြူတော်ဖက်ခြမ်းက အတော်ဝေးတယ်။ ၂၀၁၇ တုန်းက ရိုက်ထားတဲ့ဓာတ်ပုံပြပြီး အဲ့ဒီတုန်းက ကျောက်တိုင်ဖက် အိမ်ဖြူတော်ဖက်ခြမ်းကနေ ရိုက်ခဲ့တာ။ အဲ့ဒီတုန်းက ခြံစည်းရိုးနားကနေ ကပ်ရိုက်ခဲ့တာ။ ခုဆို ခြံစည်းရိုးနား ကပ်လို့မရဘူး ကားလမ်းတခုရှိနေတယ်။ နောက်ဖက်ခြမ်းကတော့ အိမ်ဖြူတော်နဲ့ အတော်နီးတယ်။ ကိုယ်တို့ နှစ်တိုင်းဆန္ဒပြတဲ့နေရာပေါ့။ ပန်းခြံမှာထိုင်နေတုန်း ရဲက ခြံနားမကပ် ကားလမ်းမပေါ် မတက်ခိုင်းဘူး ပန်းခြံထဲပဲ နေခိုင်းတယ်။ အဲ့ဒီဖက်က လူအမြဲစည်ကားတယ်။ ညနေ ၅ နာရီထိုးတော့ ဟိုတယ်ဆီပြန်နားတယ်။ မိုင်းဖန် နင့်ဟိုတယ်က ဘယ်မှာလဲ ငါလာခဲ့မယ်လို့ မတ်ဆေ့ပို့တာ မပြန်ဘူး။ မိုင်းဖန်းက Zoom ကိုသွားတယ် မိုးရွာလို့ ကိုယ်လည်း ပြတိုက်သွားတယ်။ပင်ပန်းလို့ ည ၉ နာရီကျော်တာနဲ့ အိပ်တော့တာပဲ။

Happy Traveling!

စန်းထွန်း

ဧပြီ ၁၃၊ ၂၀၂၄။